Mamlakatimizda Oʻzbekiston Respublikasi Qurolli Kuchlari tashkil etilganining 34 yilligi hamda 14-yanvar — Vatan himoyachilari kuni munosabati bilan joylarda harbiy-vatanparvarlik ruhidagi tadbirlar keng nishonlanmoqda.

Shu munosabat bilan Uzun tumanida “Askar onalarini sharaflaymiz” mavzusida maʼnaviy-maʼrifiy tadbir tashkil etildi. Tadbirda harbiy xizmatni oʻtayotgan askarlarning ota-onalari ishtirok etib, ular bilan samimiy diydorlashuv oʻtkazildi. Shuningdek, farzandlarning xizmat davomida erishayotgan yutuqlari, intizomi va masʼuliyati aks etgan lavhalar namoyish etildi.

— Farzandimni harbiy libosda, intizomli va masʼuliyatli holda koʻrish men uchun katta baxt, — deydi askar onasi Munisa opa Berdiyeva. — Uning Vatanga sidqidildan xizmat qilayotganidan faxrlanaman. Bunday eʼtibor va eʼzoz uchun barchaga chin dildan minnatdorman.

Tadbir davomida farzandlarining mard, jasur va Vatanga sodiq yigitlar boʻlib kamol topayotganini koʻrgan onalarning chehrasida quvonch, otalarning koʻksida esa faxr tuygʻulari aks etdi. Fidoyi va yurtparvar yoshlarni tarbiyalab voyaga yetkazgan ota-onalarga, ayniqsa, askar onalariga samimiy minnatdorlik soʻzlari bildirildi.

Farhod ESONOV, “Xalq soʻzi”.