“Uzbekistan Airports” pandemiya va aviatsiya sanoatining pandemiyadan keyingi tiklanishi tufayli uzilib qolgan Airports Council International (ACI) bilan hamkorlikni tikladi.

Uzbekistan Airports ACI bilan hamkorlik qilish orqali kompaniya samaradorligi va raqobatbardoshligini oshirishga yordam beradigan zamonaviy tadqiqotlar, tahlillar, oʻquv va rivojlanish dasturlari, ekspert maslahatlari va seminarlardan foydalanish imkoniyatiga ega boʻladi. Bundan tashqari, ACI boshqa yetakchi aeroportlar va soha mutaxassislari bilan tajriba almashish imkoniyatini ham taqdim etadi.

“Biz sheriklikning yangilanishi xalqaro aeroportlar bilan munosabatlarning mustahkamlanishiga olib kelishi va oʻzaro manfaatli hamkorlikni rivojlantirish uchun yangi imkoniyatlar ochishiga ishonchimiz komil. Uzbekistan Airports mintaqadagi yetakchi aviatsiya korxonalaridan biriga aylanish va Oʻzbekiston xalqaro aeroportlarini mintaqadagi havo xablariga aylantirishni maqsad qilgan. Kompaniya aeroport infratuzilmasini rivojlantirish va modernizatsiya qilishga sarmoya kiritishda davom etmoqda hamda aviatsiya sohasida yuqori sifatli xizmatlar va yechimlarni taqdim etish uchun xalqaro hamkorlar bilan faol hamkorlik qilmoqda”, — deyiladi “Uzbekistan Airports” matbuot xizmati xabarida.

ACI aeroportlarni qoʻllab-quvvatlash va rivojlantirish boʻyicha jahon yetakchisi boʻlib, 179 mamlakatdagi 650 dan ortiq aʼzolariga kerakli resurslar, tajriba va hamkorlik imkoniyatlarini taqdim etadi. ACI bilan yangilangan hamkorlik Uzbekistan Airports jahon aeroportlari hamjamiyatining faol aʼzosiga aylanish, sanoatning ilgʻor va yetakchi ishtirokchilari bilan tajriba almashish imkonini beradi.