Kinematografiya agentligi buyurtmasiga binoan Rashid Malikov rejissyorligida suratga olingan “Tutqunlik” («Nevolya») badiiy filmi Rossiyada boʻlib oʻtgan «Volokolamskiy rubej» harbiy-vatanparvarlik kinofestivalida “Gran-pri” bosh sovrini bilan taqdirlandi.

Mazkur kinofestival 2004-yildan buyon Ikkinchi jahon urushida katta jang maydoniga aylangan Rossiyaning qadimiy Volokalamsk shahrida oʻtkazilib kelinadi. Unda harbiy-vatanparvarlik mavzusida suratga olingan badiiy va hujjatli filmlar saralab olinadi.

«Tutqunlik» filmi real voqealarga asoslangan boʻlib, unda Yaqin Sharqdagi urush oʻchogʻidan vatandoshlarimizni qaytarilishi aks ettirilgan. 2019-2020-yillar oʻtkazilgan mazkur “Mehr” operatsiyasi Oʻzbekiston Respublikasi Prezidenti Shavkat Mirziyoyev tashabbusi bilan tashkil etilgan.

“Mehr” operatsiyasi Oʻzbekiston Respublikasi Prezidenti Shavkat Mirziyoyevga tegishli boʻlib, ushbu tashabbus oʻzbek kinematografistlarini ham befarq qoldirmadi. Birinchi opreatsion harakatlardan keyin bu borada hujjatli film suratga olingan. Unda jarayon haqida batafsil va aniq maʼlumotlar keltirilgan. Keyin badiiy film ham suratga olindi», deya taʼkidladi Kinematografiya agentligi Bosh direktori Firdavs Abduxoliqov.

“Film gʻoyasi 2020-yilning yoz oylarida tugʻildi. «Mehr” operatsiyasi bu ulkan insonparvarlik harakatlari boʻlib, uni insonlarga koʻrsatish lozim. Kinokartinaning suratga olish ishlari esa 2021-yilning aprel oyida boshlangan», deydi film rejissyori Rashid Malikov.

Maʼlumot uchun, “Tutqunlik” kinokartinasi yaqinda Turkiyaning «Korkut Ata» xalqaro kinofestivalida ham ishtirok etib, hakamlar hayʼatining maxsus sovriniga sazovor boʻlgan edi.