Illyustrativ foto

Kecha, 8-oktyabr kuni soat 20:35 da Fargʻona xalqaro aeroportiga Turkiyaning Istanbul shahridan uchib kelgan samolyotda 13 yoshli Oʻzbekiston fuqarosi vatanga qaytdi. U chet elda ogʻir hayotiy vaziyatda qolib, Oʻzbekistonning Istanbuldagi Bosh konsulxonasi xodimlariga yordam soʻrab murojaat qilgan, deb xabar bermoqda Ijtimoiy himoya milliy agentligi.

Qayd etilishicha, ushbu holat yuzasidan Tashqi ishlar vazirligi hamda Ijtimoiy himoya milliy agentligining tezkor hamkorlikdagi harakatlari natijasida voyaga yetmagan fuqaro xavfsiz ravishda vatanga qaytarilgan.

Fargʻona xalqaro aeroportida bolani Qoʻqon shahar “Inson” ijtimoiy xizmatlar markazi xodimlari kutib olgan, hozirda uni buvisining qaramogʻiga topshirish masalalari boʻyicha zarur choralarini koʻrmoqda.

“Voyaga yetmagan fuqaroning ijtimoiy himoyasi va psixologik qoʻllab-quvvatlanishi uning doimiy yashash manzilida davom ettiriladi”, deyiladi xabarda.

Shuningdek, agentlik yaqin kunlarda ushbu mamlakatda ota-ona qaramogʻisiz qolgan yana 30 nafardan ortiq oʻzbekistonlik bolani vatanga qaytarish rejalashtirilganini ham qoʻshimcha qilgan.