Tugʻma karlik nuqsoni bilan dunyoga kelgan 5 nafar bola endi soʻz va tovushlarni hech qanday eshitish moslamalarisiz tinglab, talaffuz qila oladi. Bu olamshumul voqelik genetika muhandisligining irsiy kasalliklar ustidan gʻalabasi, deb baholanmoqda.

Mazkur noyob muolaja usuli mualliflari — AQSHning Garvard tibbiyot maktabi va Xitoyning Fudan universiteti olimlari. “Sinxua” agentligi xabariga koʻra, ushbu inqilobiy natijaga shanxaylik tadqiqotchilar tomonidan yaratilgan RRG-003 gen preparati tufayli erishilgan.

Klinik sinovlar maktabgacha taʼlim yoshidagi 6 nafar tugʻma karlik nuqsoni bor bolada oʻtkazildi. Buning uchun yangi preparat quloqqa inyeksiya orqali yuborildi. Maʼlum muddat oʻtgach, olti bemordan besh nafarida eshitish hamda nutq funksiyalari tiklandi.

Olimlar olti oydan koʻproq vaqt davomida barcha bolalar ahvoli va salomatligini kuzatib borishdi. Ijobiy xulosaga kelingach, tadqiqot natijalari keng jamoatchilikka maʼlum qilindi.

Ularning qayd etishicha, yaratilgan dori quloqqa kiritilishi bilanoq eshitish qobiliyati bir zumda tiklanib qolmaydi. Muolajaning yaqqol natijalari inyeksiyadan toʻrt hafta oʻtib sezila boshlaydi.

Avval jonivorlar, soʻng insonlarda oʻtkazilgan sinovlar muvaffaqiyatli kechganiga qaramay, mutaxassislar yangi davolash usulini dunyo boʻylab ommaviy qoʻllash uchun hali biroz erta, degan xulosada.

Chunki gen terapiyasining xavfsizligi va samaradorligiga toʻliq ishonch hosil qilish uchun yana ayrim qoʻshimcha tadqiqot hamda kuzatuvlarga ehtiyoj bor. Shu bois u dastlabki bosqichda bir necha mamlakatdagina tibbiy amaliyotga tatbiq etilishi mumkin.

Eslatib oʻtamiz, bugungi kunda dunyo boʻyicha 26 million kishi tugʻma karlikdan aziyat chekmoqda. Bunday tashxis qoʻyilgan bolalar miyasi normal rivojlana olmaydi. Hozirgacha mazkur nuqsonni bartaraf etishda koxlear implantlaridan boshqa samarali davolash usuli mavjud emas. Yangi kashfiyot natijalarini esa vaqt koʻrsatadi.