“Reuters” xabariga koʻra, AQSH prezidenti Donald Tramp va Xitoy Xalq Respublikasi raisi Si Szinpin Janubiy Koreyada boʻlib oʻtgan ATES sammiti doirasida uchrashuv oʻtkazdilar. Bu — ikki davlat rahbarining 2019-yildan buyon ilk yuzma-yuz uchrashuvi boʻldi.

Uchrashuv bir soat 40 daqiqa davom etdi. Trampning soʻzlariga koʻra, tomonlar muddatli (bir yillik) savdo kelishuviga erishgan, u har yili avtomatik tarzda uzaytirib boriladi. Tez orada rasmiy shartnoma imzolanishi kutilmoqda.

Savdo urushi davrida AQSH tomonidan joriy etilgan xitoy tovarlariga boj stavkalari 57 foizdan 47 foizgacha — 10 foizga pasaytiriladi. Shuningdek, kamyob metallarga oid masalalarda ham kelishuvga erishilgan.

Bundan tashqari, Tramp va Si Szinpin Ukraina boʻyicha hamkorlik qilishga kelishib oldilar. AQSH rahbarining aytishicha, tomonlar bu masalada birgalikda ishlashni rejalashtirmoqda.

Uchrashuv yakunida Tramp 2026-yil aprel oyida Xitoyga tashrif buyurishi, Si Szinpin esa biroz keyinroq AQSHga borishi haqida kelishuvga erishilgan.

Jurnalistlarning “uchrashuvni 1 dan 10 gacha baholang” degan savoliga Tramp hazilomuz tarzda:

“12”, — deb javob bergan.