AQSH prezidenti Donald Tramp Urush vazirligiga (Pentagon) yadro qurollari sinovlarini zudlik bilan qayta boshlash topshirigʻini berdi. Bu haqda u “Truth Social” ijtimoiy tarmogʻidagi sahifasida yozdi.

“Qoʻshma Shtatlar dunyoda eng katta yadroviy arsenalga ega davlat. Bunga mening birinchi prezidentlik davrimda mavjud qurollarni toʻliq yangilash va modernizatsiya qilish orqali erishildi. Ulkan vayronkor kuchi sabab bunga qoʻlim bormasdi, ammo boshqa yoʻl yoʻq edi! Rossiya ikkinchi oʻrinda, Xitoy esa ancha orqada — biroq u bizni besh yil ichida quvib yetadi. Shu sababli, boshqa mamlakatlar sinov dasturlarini davom ettirayotgani bois, Men Urush vazirligiga (Pentagon) bizning yadroviy qurollarimizni teng sharoitda sinovdan oʻtkazishni boshlashni buyurdim. Bu jarayon darhol boshlanadi”, — deb yozdi Tramp.

Respublikachining soʻzlariga koʻra, AQSH hukumati sinovlar oʻtkaziladigan joy va vaqtni keyinroq eʼlon qiladi.

Reuters agentligi maʼlumotiga koʻra, Qoʻshma Shtatlar oxirgi marta 1992-yilda yadroviy sinovlar oʻtkazgan. Hozircha Tramp Milliy yadroviy xavfsizlik boshqarmasi tomonidan oʻtkaziladigan portlovchi yadroviy sinovlarni nazarda tutganmi yoki yadroviy raketa tizimlarining uchish sinovlarini nazarda tutganmi — bu nomaʼlumligicha qolmoqda.