Joriy yilning 24-noyabr kuni Oliy Majlis Senati Raisi Tanzila Narbayeva Tojikiston Respublikasining Favqulodda va Muxtor Elchisi Abdujabbor Rahmonzoda bilan uchrashdi.

Suhbat davomida oʻzbek va tojik xalqlarini azaldan umumiy tarix, din, madaniyat, yagona qadriyat va anʼanalar birlashtirib turishi alohida taʼkidlandi.

Oʻzbekiston va Tojikiston Prezidentlarining siyosiy irodasi ikki tomonlama aloqalarni rivojlantirish va chuqurlashtirish uchun asos sifatida hal qiluvchi ahamiyatga ega ekanligi taʼkidlandi.

Suhbat chogʻida Elchining Oʻzbekistondagi diplomatik faoliyatining muvaffaqiyatli va samarali davri sarhisob qilindi. Uning soʻnggi yillar ichida Oʻzbekiston-Tojikiston munosabatlarini rivojlantirish va mustahkamlashga qoʻshgan salmoqli hissasi qayd etildi.

Parlamentlararo, shu jumladan xalqaro parlament tuzilmalari doirasidagi hamkorlikni yanada mustahkamlash masalalariga alohida eʼtibor qaratildi. Bu borada parlamentlararo muloqotning oʻrni alohida qayd etilib, ikki davlat parlamentlarining yuqori palatalari oʻrtasida tuzilgan doʻstlik guruhlari salohiyatidan yanada samarali foydalanish yuzasidan fikr almashildi. Shuningdek, ikki tomonlama muloqotni faollashtirishda parlamentlarning ahamiyati tobora ortib borayotgani qayd etildi.

Uchrashuv yakunida Senat Raisi Elchiga keyingi diplomatik faoliyatida muvaffaqiyatlar tiladi.