Oʻzboshimchalik bilan egallab olingan yer maydoniga egalik guvohnomasini rasmiylashtirib, uy-joy qurish uchun ruxsat olib berishni vaʼda qilgan kadastr muhandisi qoʻlga olindi. Bu haqida “Xavfsizlik” Telegram-kanali xabar berdi.

Xabarda aytilishicha, Davlat kadastrlar palatasining Oqqoʻrgʻon tuman filiali kadastr muhandisi oʻz xizmat mavqeyidan foydalanib, mahalliy fuqaro tomonidan oʻzboshimchalik bilan egallab olingan 9 sotix yer maydoniga Oʻzbekiston Respublikasining 2024-yildagi “Oʻzboshimchalik bilan egallab olingan yer uchastkalariga hamda ularda qurilgan binolar va inshootlarga boʻlgan huquqlarni eʼtirof etish toʻgʻrisida”gi qonuni doirasida egalik guvohnomasini rasmiylashtirib, uy-joy qurish uchun ruxsat olib berish evaziga 1 ming 200 AQSH dollari talab qilgan.

Davlat xavfsizlik xizmatining Toshkent viloyati boʻyicha boshqarmasi hamda Iqtisodiy jinoyatlarga qarshi kurashish departamenti hamkorligida oʻtkazilgan tezkor tadbirda kadastr muhandisi soʻralgan pul mablagʻini olgan vaqtida ashyoviy dalillar bilan ushlangan.

Hozirda qonunbuzarga nisbatan Jinoyat Kodeksining 168-moddasi 3-qismi “v” bandi va 28,211-moddasi 1-qismi bilan jinoyat ishi qoʻzgʻatilib, tergov harakatlari boshlab yuborilgan.