Toshkent va Andijon shaharlarida havo sifati yomonlashgani sababli aholi ehtiyot choralarini koʻrishga chaqirildi. Bu haqida Gidrometeorologiya xizmati agentligi xabar berdi.

Unda aytilishicha, bugun, 11-noyabr kuni avtomatik monitoring stansiyasi maʼlumotlariga koʻra, Andijon avtomatik stansiyasida soat 10:00 atmosfera havosidagi PM10-mayda zarrachalarining miqdori 502 mkg/m3 ni tashkil etgan. Bu koʻrsatkich soatlik ruxsat etilgan meʼyordan 1,0 barobar oshgan.

Shuningdek, PM2,5-mayda dispersli zarrachalarining tarkibi 314 mkg/m3 ni tashkil etgan va soatlik ruxsat etilgan meʼyordan 8,9 barobar koʻpaygan.

Bundan tashqari, soat 09:00 holatiga koʻra atmosfera havosi ifloslanishi monitoringi avtomatik stansiyalari maʼlumotlariga koʻra, Toshkent shahrining atmosfera havosidagi PM10-mayda dispersli zarrachalarning miqdori 189 mkg/m3 ni tashkil etgan. Bu esa ruxsat etilgan meʼyorlardan (REM) (300 mkg/m3) oshmagan.

PM2,5-mayda dispersli zarrachalar miqdori 143 mkg/m3 ni tashkil etdi, ruxsat etilgan meʼyorlardan (60 mkg/m3) 2,4-marta ortgan.

“Toshkent va Andijon shahri aholisi hamda mehmonlaridan ehtiyot choralarini koʻrishlarini soʻraymiz. Ochiq havodagi faoliyatlarini qisqartirishlari, tashqariga chiqqanda niqob taqishlarini tavsiya etamiz”, — deyiladi “Oʻzgidromet” ogohlantirish xabarida.