Furqat tumanida birgina joriy yilning oʻzida “Tashabbusli byudjet” doirasida 4 ta maktabgacha taʼlim tashkiloti, 10 ta umumtaʼlim maktabi loyiha gʻolibi boʻldi.

Ayni jarayonda 17-umumtaʼlim maktabida ham keng koʻlamli qurilish-bunyodkorlik ishlari olib borildi. Natijada 120 oʻrinli qoʻshimcha oʻquv binosi barpo etilib, zamonaviy mezonlar asosida jihozlandi. Oʻz navbatida, toʻliq infratuzilma va xavfsizlik tizimlari bilan taʼminlandi.

— Umuman olganda, joriy yilda tuman miqyosida 14 ta loyiha gʻolibligi uchun davlat byudjetidan 21 milliard soʻm mablagʻ ajratildi, —deydi Furqat tumani maktabgacha va maktab taʼlimi boʻlimi boshligʻi Muhammadjon Ortiqov. — Aytaylik, birinchi mavsumda ajratilgan mablagʻlar hisobiga 7 ta maktabda rekonstruksiya qilish, 120-150 oʻrinli qoʻshimcha binolar qurish ishlari bajarildi.

Shu tariqa 17-umumtaʼlim maktabida yangi oʻquv binosi foydalanishga topshirilgan boʻlsa, yana 6 ta maktabda belgilangan yumushlar yakuniga yetkazildi. Yaqin vaqt ichida ikkita bogʻchada taʼmirlash ishlariga kirishiladi.

“Tashabbusli byudjet”ning joriy yilgi ikkinchi mavsumida 5 ta loyiha yutib olindi. Unga koʻra, 3 ta umumtaʼlim maktabi elektron doskalar, kompyuterlar bilan jihozlanadi. Ikkita eski bogʻchada mukammal taʼmirlash ishlari amalga oshirilib, qoʻshimcha binolar qurib bitkaziladi.

Aytish joiz, ezgu maqsad ijobati tufayli Furqat tumani maktablarida qoʻshimcha 1000 oʻquvchi oʻrni yaratilib, ikki navbatli oʻquv jarayoni bitta navbatga tushirilishiga erishildi. Bu taʼlim sifati va samaradorligini oshirishda muhim ahamiyatga ega, albatta.

Botir MADIYOROV

“Xalq soʻzi”.