Oʻzbek ijrochisining yuqori texnik mahorati barchada iliq taassurot qoldirdi. Oʻzbekistonning taniqli pianinochisi Bexzod Abduraimov Parijdagi mashhur Luvr muzeyida konsert berdi.

Konsert Luvrda davom etayotgan “Markaziy Osiyo ulugʻvorligi. Oʻzbekiston karvon yoʻllarida” koʻrgazmasi doirasida tashkil etildi.

Ushbu madaniy dastur Oʻzbekiston Vazirlar Mahkamasi huzuridagi Sanʼat va madaniyatni rivojlantirish jamgʻarmasi koʻmagida oʻtkazildi.

Konsertda Bexzod Abduraimov Robert Shumanning “Kreisleriana opus 16”, Dilorom Saidaminovaning “Qadimgi Buxoro devorlari”, Modest Musorgskiyning “Koʻrgazmadagi rasmlar” asarlarini mahorat bilan ijro etdi.

Eslatib oʻtamiz, Bexzod Abduraimov 2009-yilda London xalqaro pianinochilar tanlovi laureati boʻlgan. Shuningdek, u Mariinskiy teatri simfonik orkestri, Myunxen filarmonik orkestri, Leypsig Gevandxaus orkestri, Frankfurt radiosi simfonik orkestri, Birmingem simfonik orkestri hamda boshqa koʻplab ansambllari konsertlarida ishtirok etgan.

Oʻzbek ijrochisining yuqori texnik mahorati barchada iliq taassurot qoldirdi. Musiqiy sanʼat kechasiga kelgan tomoshabinlar Bexzod Abduraimovning yuksak mahoratini eʼtirof etish barobarida Oʻzbekistonda musiqa sanʼatini rivojlantirishga qaratilayotgan eʼtiborni alohida taʼkidlashdi.