Elyor HAYDAROV/“Xalq soʻzi”. Joriy yilning 18-19-oktyabr kunlari Nizomiy nomidagi Toshkent davlat pedagogika universitetida “Tabiiy fanlar: yangicha yondashuvlar va dolzarb tadqiqotlar” mavzusida xalqaro ilmiy-amaliy konferensiya boʻlib oʻtmoqda. Unda mamlakatimizning yetuk olimlari bilan birga Rossiya, Germaniya, Xitoy, Qozogʻiston, Qirgʻiz Respublikasi, Yaponiya, Pokiston va boshqa xorijiy davlatlar vakillari ham oʻz ilmiy maʼruzalari bilan ishtirok etmoqda.

Mazkur anjuman insonning tabiatga munosabati, atrof-muhit muhofazasi kabi dolzarb masalalarga bagʻishlangan. Bundan tashqari, konferensiyada geografiya, biologiya, kimyo va ekologiya fanlariga doir innovatsion tadqiqotlar hamda sohadagi muammolar boʻyicha olib borilgan ilmiy izlanishlar taqdim etilmoqda.

— Anjumanda tabiiy fanlardagi bugungi dolzarb muammolar qamrab olingan, — deydi biologiya fanlari doktori Oʻktam Xoʻjanazarov. — Jumladan, bugungi kunda yurtimizda choʻllashish jarayonini bartaraf etishga bagʻishlangan ilmiy izlanishlar boʻyicha muhokamalar oʻtkazildi. Oʻzbekistonning janubiy hududlarida biologik xilma-xillik hamda noyob dorivor oʻsimliklarni saqlab qolish boʻyicha maʼruzalarni tingladik. Albatta, bu izlanishlar chet ellik olimlar bilan hamkorlikda amalga oshirilsa, yanada samarali natijalarga erishishimizga ishonchimiz komil.