Bugun tabiiy gaz yetishmagan mahalla va qishloqlar aholisi roʻzgʻorida maishiy gaz ballonlaridan foydalanishadi. Hududiy gaz taʼminoti boʻlimlari tomonidan har 40 – 45 kunda koʻchama-koʻcha yurib, aholiga gaz balloni tarqatib chiqishadi.

Toʻgʻrisi, bugungi kunda “maishiy gaz ballon jumragi yaxshi buralmayapti, ballondagi gaz 10 kunga ham yetmaydi, gazi kam toʻldirilibdi, ballonning oʻzi nosoz ekan” qabilidagi savollar bilan murojaat qiluvchilar anchagina. Xoʻsh, aslida tarqatilgan gaz ballonlarining soz yoki nosozligi uchun kim masʼul? Gaz ballonlarining qachon texnik koʻrik va sinovdan oʻtkazilganini qanday bilish mumkin? Nosoz gaz ballon qaytarib olingach, sozlanmasdan yana birovga borib qolishiga kim kafolat beradi?

— Aholiga tarqatilgan maishiy gaz ballonlarida nosozlik aniqlansa, uni faqatgina hududiy gaz toʻldirish shoxobchalarida joylashgan taʼmirlash va sinovdan oʻtkazish sexlaridagina kamchilikni bartaraf etish mumkin, — deydi “Hududgaz Samarqand” gaz taʼminoti filiali suyultirilgan gaz boʻlimi boshligʻi Maʼruf Pardayev. — Oʻzboshimchalik bilan uni singan yoki yorilgan qismlarini payvandlash, sozlash yoki murvatlarini almashtirishlari mumkin emas. Bu vazifani faqatgina sinov sexlaridagi malakali texnik mutaxassislar tomonidan amalga oshiriladi.

“Hududgaztaʼminot” AJ “Hududgaz Samarqand”gaz taʼminoti filiali qoshida 6 ta maishiy gaz ballonlarni taʼmirlash va sinovdan oʻtkazish sexlari faoliyat olib boradi. Ular muntazam sinov muddati kelgan yoki taʼmirtalab boʻlib qolgan maishiy gaz ballonlarini taʼmirlab va katta bosim ostida texnik sinovdan oʻtkazishadi.

Maʼlumotlarga koʻra, joriy yilning oʻtgan yarim yilligida viloyat boʻyicha 40 mingtaga yaqin maishiy gaz balonlari taʼmirlanib, sinovdan oʻtkazilib, qariyb 26 ming dona jumraklar almashtirilgan.

Hozirda viloyat aholisining ixtiyorida 26 mingdan oshiq shaxsiy gaz ballon boʻlib, ular ham hududiy gaz taʼminoti boʻlimlari tomonidan aylanma tara asosida toʻldiriladi.

Kattaqoʻrgʻon gaz toʻldirish shoxobchasida joylashgan 5 ta gaz sigʻimlarida 42,5 tonna tabiiy gaz saqlanadi. Tuman aholisi ixtiyorida 39 mingga yaqin maishiy gaz ballonlari boʻlib, ularga kuniga 23 tonna gaz joylab joʻnatiladi. Oʻtgan yili korxonalardan ikki xil sigʻimdagi 70 ta yangi ballon qabul qilib olingan. Har oyda mingta yangi joʻmrak yangilanadi.

— Joriy yilning oʻzida 7 mingtaga yaqin gaz ballonlarini taʼmirlab sinovdan oʻtkazdik, — deydi shoxobcha rahbari Alijon Saidov. — Kuniga 50-60 ta ballon koʻzdan kechirilib, nosozlari taʼmirlanadi va 20 atmosfera bosim suv bilan sinovdan oʻtkaziladi. Buzuq joʻmraklar yangisiga almashtiriladi. Sinovdan oʻtkazilganligi bildiruvchi tamgʻa urilib, ranglanadi. Va yana gaz quyilib, mashinalarda aholiga joʻnatiladi. Shoxobchada 5 ta gaz toʻldirish va 2 ta ogʻir qoldiq toʻkish uskunasi, 7 ta maxsus ballon tarqatuvchi yuk mashinasi bor.

Biroq xususiy gaz quyish shoxobchalarida bunday imkoniyatlar yoʻq. Tuman aholisiga “Shuhrat Mundiyon global servis” MCHJ tomonidan ham ballonlarga gaz quyish xizmati koʻrsatildi. Oyiga 200 tonna gaz tarqatuvchi mazkur xususiy korxonada maishiy gaz ballonlar taʼmirlanib, sinovdan oʻtkazilmaydi. Mazkur korxonada maxsus sinovdan oʻtkazish va taʼmirlash sexi yoʻq. Nafaqat korxona ishchilarning balki, aholining ham xavfsizligini taʼminlash koʻzda tutilmagan. Bu kabi kamchiliklar barcha xususiy korxonalarda uchraydi.

Axir, oʻta xavfli boʻlgan gaz toʻldirilgan ballonlarni ishlatishda yoʻl qoʻyilgan salgina ehtiyotsizlik katta falokatni keltirib chiqarishi mumkin. Buning uchun soha masʼullari xususiy korxonalar bilan gaz quyish xizmati uchun shartnoma tuzishda shu jihatga alohida eʼtibor qaratishlari kerak. Chunki, inson hayoti hamma narsadan ustun.

Abdulaziz YOʻLDOSHEV

“Xalq soʻzi”