Ahmadali ShERNAZAROV/“Xalq soʻzi”. Tibbiy xizmatni aholiga yanada yaqinlashtirish tibbiyot sohasida olib borilayotgan islohotlarning ustuvor vazifalaridan biri hisoblanadi. Yaqinda Sirdaryo viloyati ftiziatriya va pulmonologiya markaziga topshirilgan tuberkulyoz va oʻpkaning nospetsifik kasalliklarini skrining tekshiruvidan oʻtkazishga moslashtirilgan koʻchma tibbiy-diagnostika kompleksi ham ayni maqsadga xizmat qiladi.

Ushbu kompleks jami 1milliard 350 million soʻmlik GeneXpert uskunasi, spirometriya va rentgen apparati kabi eng zamonaviy tibbiy asbob-uskunalar bilan jihozlangan. U chekka hududlarda yashovchi aholi orasida tuberkulyoz va oʻpka nospetsifik kasalliklari oldini olish, erta tashxislash, skrining qilish imkonini beradi.

— Mobil kompleksimizning hududlarda boʻlishi aniq jadval asosida tashkil etiladi, — deydi Sirdaryo viloyati ftiziatriya va pulmonologiya markazi bosh shifokori, tibbiyot fanlari nomzodi Erkin Aliqulov. — Aholi uchun tekshiruvlar tekin boʻlib, maqsad tuberkulyoz va oʻpka nospetsifik kasalliklari oldini olish va erta aniqlashdan iborat. Bunda skring tekshiruvlarni birinchi navbatda ushbu xastaliklarga moyil kishilarda amalga oshirilishiga alohida eʼtibor qaratiladi.