Foto: “Xalq soʻzi”

Shu yilning 30-may — 1-iyun kunlari Singapurda oʻtkazilgan uchinchi musulmon davlatlari turizm bozorida rivojlanishning yangi yoʻnalishlarini belgilab berdi.

Sammitda turizmni barqaror rivojlantirish hamda halol turizmidagi tendensiyalar boʻyicha 50 dan ortiq maʼruzalar tinglandi.

Xalqaro sammitda 140 davlat orasida Xiva shahri “Yilning islom merosi destinatsiyasi” (Islamic heritage destination of the year) nominatsiyasi boʻyicha yuksak baholanib, koʻhna kentning turizm salohiyati alohida eʼtirof etildi.

Eʼtiborlisi, nufuzli anjumanda Xorazm viloyati turizm sohasi vakillaridan iborat delegatsiya ham qatnashib, yakunda bir qator istiqbolli kelishuvlarga erishildi.

— Yuzma-yuz muloqotlarning asosiy voqealaridan biri “Mastercard-CrescentRating Global Muslim Travel Index (GMTI) 2023” hisobotining ishga tushishi boʻldi, — deydi Xorazm viloyati madaniyat va turizm boshqarmasi boshligʻi Azamat Xoʻjayev. — Sammit tajriba almashinuvi, hamkorlik va innovatsiyalar uchun platforma boʻlib, butun dunyo boʻylab musulmon sayohatchilar uchun yanada inklyuziv va qulay sayohatni amalga oshirishda muhim ahamiyat kasb etadi.

Odilbek ODAMBOYEV, “Xalq soʻzi”.