Chilonzor tumani boʻyicha IIO FMB huzuridagi Tergov boʻlinmasi tomonidan Respublika Shoshilinch tibbiy yordam ilmiy markazi (RSHTYOIM) shifokorlariga nisbatan Oʻzbekiston Respublikasi Jinoyat kodeksining 116-moddasi 3-qismi (Kasb yuzasidan oʻz vazifalarini lozim darajada bajarmaslik, ehtiyotsizlik orqasida odam oʻlimiga sabab boʻlsa) bilan jinoyat ishi qoʻzgʻatildi. Bu haqda Oʻzbekiston Respublikasi IIV huzuridagi Tergov departamenti xabar berdi.

Unga koʻra, tergovga qadar tekshiruv harakatlarida, 2019-yilning 23-aprel kuni 63 yoshli Negmurat A. RSHTYOIMga murojaat qilib, shifokorlar tomonidan unga «boʻyin oʻng ichki uyqu arteriyasi egriliklarini toʻgʻirlash, tomirda hosil boʻlgan trombni olib tashlash uchun jarrohlik amaliyoti oʻtkazilganligi va 2019-yil 10-oktyabr kuni Negmurat A. toʻsatdan vafot etganligi aniqlangan.

Sud tibbiy ekspertizaning 2021-yil 8-yanvar kungi xulosasida Negmurat A.ning oʻlimiga bosh miya qon aylanishining oʻtkir buzilishi, uning pastki kovak venasida yot jism (50 sm katetr sim) qolib ketishi sabab boʻlganligi koʻrsatilgan.

Hozirda ayblanuvchilarning doirasini aniqlash, shifokorlarning xatti-harakatlariga huquqiy baho berish yuzasidan tergov harakatlari olib borilmoqda.