“Real Madrid” klubi Oʻzbekiston terma jamoasi hamda “Manchester Siti” himoyachisi Abduqodir Husanovni ijaraga olmoqchi. Bu haqda “Fichajes” nashri xabar berdi.

Manbaga koʻra, “qirollik klubi” “Manchester Siti” rejalariga toʻliq kirmay qolayotgan oʻzbekistonlik markaziy himoyachini ijaraga olish variantini jiddiy koʻrib chiqmoqda. Bu orqali madridliklar himoya chizigʻini katta sarmoyasiz mustahkamlashni maqsad qilgan.

Qayd etilishicha, ushbu ehtimoliy kelishuv “Real Madrid”ning hozirgi strategiyasiga mos keladi. Jamoa himoyadagi jarohatlar va rotatsiya yetishmasligi sabab qisqa muddatli yechim izlamoqda. Shu nuqtayi nazardan, Abduqodir Husanov transfer bozoridagi eng maʼqul variant sifatida baholanmoqda. Madridliklar Angliya klubidan Husanovning ijara shartlari boʻyicha maʼlumot olgan.

Xabaringiz bor, 21 yoshli oʻzbekistonlik futbolchi Abduqodir Husanov joriy yilning yanvar oyida Fransiyaning “Lans” klubidan taxminan 40 million yevro evaziga “Manchester Siti”ga oʻtgan edi. Biroq Pep Gvardiola jamoasida yuqori raqobat tufayli u kam oʻyin amaliyotiga ega boʻldi.

“Angliya klubida futbolchining rivoji uchun unga muntazam oʻyin amaliyoti zarurligi tan olinmoqda va shu sabab ijara varianti real koʻrilmoqda, ayniqsa «Real Madrid” kabi yuqori saviyali klubga», deyiladi manba xabarida.

Taʼkidlanishicha, Madridda Husanovning jismoniy kuchi, havodagi ustunligi va oʻsish salohiyati yuqori baholanmoqda. Unga zamonaviy markaziy himoyachi, toʻp bilan oʻynashda ishonchli va turli taktik sxemalarga moslashuvchan futbolchi sifatida qaralmoqda. “Real” uni ijara asosida olib, yuqori talab darajasida oʻzini qanday koʻrsatishini baholashni rejalashtirgan. Hozircha majburiy sotib olish bandi koʻzda tutilmagan.

Sport jihatidan tashqari, madridliklar bu transferning institutsional va marketing tomonlarini ham inobatga olgan. Oʻzbekistonlik futbolchining kelishi “Real Madrid” brendining Osiyo bozoridagi nufuzi oshishiga xizmat qilishi mumkin. Bu omil hal qiluvchi emas, ammo umumiy baholashda muhim ahamiyat kasb etadi.

Shuningdek, “Manchester Siti” ham futbolchini toʻliq sotish niyatida emas, balki uning rivoji uchun ijaraga berishga tayyor. Tomonlar oʻrtasidagi muzokaralar hali boshlangʻich bosqichda, qaror esa ijara shartlari va maosh taqsimotiga bogʻliq boʻladi. “Real Madrid” esa qishki bozorda shoshilmasdan, iqtisodiy muvozanatni saqlagan holda himoyani kuchaytirishni koʻzlamoqda.