Oʻzbekiston Respublikasi Prezident Shavkat Mirziyoyev shaxmat boʻyicha Jahon kubogi gʻolibi Javohir Sindorov bilan telefon orqali soʻzlashib, uni tarixiy gʻalaba bilan tabrikladi.

“Javohir, bolam men ana sening buyuk gʻalabang bilan tabriklayman. Oʻzbek farzandi, yangi Oʻzbekiston nimaga qodir ekanini dunyoga tarannum qilganing uchun men faxrlanaman. Ilohim, mana shu yutuqlaring bardavom boʻlsin. Ota-onang, bobolaring qanday xursand boʻlsa, men ham xursand boʻldim. Ilohim, yaxshi kunlaringda sherik boʻlay. Bu hammamizga gʻurur bagʻishlaydi. Men senday farzandim borligidan yana bir marta faxrlanaman”, deydi davlat rahbari.

Javohir Sindorov ham Prezidentimizga minnatdorlik bildirar ekan, bu natijalar oʻzbek shaxmatida hali boshlanishi ekanini mamnuniyat bilan qayd etdi.

Avvalroq Olimpiya shaharchasidagi stadionda davlatimiz rahbari “Prezident olimpiadasi” musobaqasining tantanali ochilish marosimida nutq soʻzlayotib, shaxmat boʻyicha Jahon kubogida gʻalaba qozongan Javohir Sindorovni tabriklagan edi.

“Mana menga yangi xushxabar keldi. Hozirgi daqiqalarda yana bitta xushxabar: 19 yashar vatandoshimiz Javohir Sindorov Hindistonda oʻtayotgan jahon kubogining gʻolibi boʻldi. Javohir finalda xitoylik Vey Ini yutib, 2026-yildagi Jahon chempionatining chempionligiga daʼvogar boʻldi. Hamma aytgan gaplarimizning tagida zamin borligidan yana bitta dalil desak va Javohir qahramonimizni yana bir marta olqishlasak”, degandi Prezidentimiz.

Oʻzbekistonlik 19 yoshli grossmeyster Javohir Sindarov Hindistonning Goa shahrida oʻtkazilgan FIDE Jahon kubogi – 2025 finalida gʻalaba qozonib, dunyo shaxmat taxtining yangi chempioniga aylandi.

Final bahsida Sindarov Xitoy vakili Vey I bilan hal qiluvchi duelga chiqdi va qora donalarda ishonchli oʻyin namoyish etib, raqibini magʻlubiyatga uchratdi. Shu tariqa, u Jahon kubogining bosh sovrini 120 ming AQSh dollari miqdoridagi mukofotni qoʻlga kiritdi. Eng muhimi, bu gʻalaba unga 2026-yilgi Nomzodlar turniriga rasmiy yoʻllanmani ham taqdim etdi. Bu shaxmat olamida eng yuksak marralardan.

Shuningdek, Javohirning ushbu natijasi Oʻzbekiston shaxmat maktabining kuchini yana bir bor isbotladi. Qayd etish joizki, bundan 21 yil avval Rustam Qosimjonov ham Jahon kubogi sohibi boʻlib, tarixga kirgan edi. Bugun esa Javohir Sindarov ana shu faxrli anʼanani davom ettirdi.

Murosasiz bahslarda kechgan oʻyinga qisqacha toʻxtalmasak boʻlmaydi. Tay-brekning birinchi partiyasida Vey I 30-yurishda jiddiy xatoga yoʻl qoʻydi. Biroq vaziyat murakkab boʻlgani bois, Javohir yutuqqa eltuvchi yagona variantni darhol topa olmadi va partiya durang bilan yakunlandi. Shunga qaramay, asosiy qarama-qarshilikda Sindarov oʻzini qoʻlga oldi, raqibining zaif nuqtalarini topdi va qatʼiyat bilan gʻalabani qoʻlga kiritdi.