Oʻzbekiston Respublikasi Prezidenti Shavkat Mirziyoyev “Bolalar masalalari boʻyicha komissiyalar faoliyatining samaradorligini oshirish chora-tadbirlari toʻgʻrisida”gi Farmonini imzoladi. Bu haqda “Huquqiy axborot” kanali xabar berdi.

Farmonga koʻra, bir qator masalalar oʻz yechimini topdi. Birinchidan, Bolalar masalalari boʻyicha milliy komissiyaning yangilangan tarkibi tasdiqlandi.

Ikkinchidan, Bolalar masalalari boʻyicha Qoraqalpogʻiston Respublikasi, viloyatlar, Toshkent shahri va tuman (shahar) komissiyalarining namunaviy tarkiblari ham aniqlandi.

Shuningdek, bolalarning huquqlari, erkinliklari va qonuniy manfaatlarini amalda roʻyobga chiqarish, ularning jismoniy, intellektual, maʼnaviy hamda axloqiy jihatdan kamol topishiga, qobiliyati va isteʼdodini toʻliq namoyon etishiga koʻmaklashish boʻyicha chora-tadbirlarni muvofiqlashtirish ularning asosiy vazifalaridan biri etib belgilandi.

Bundan tashqari, Ijtimoiy himoya milliy agentligi, uning joylardagi boshqarmalari hamda tuman (shahar) “Inson” ijtimoiy xizmatlar markazlari tegishlicha Bolalar masalalari boʻyicha milliy komissiya va hududiy komissiyalarning ishchi organi vazifasini bajaradi.