Ijtimoiy tarmoqlarda yoz oylaridagi eng talabgir mahsulot boʻlgan shakarning narxi oshishi haqida xabarlar tarqaldi. Raqobatni rivojlantirish va isteʼmolchilar huquqlarini himoya qilish qoʻmitasi raisi maslahatchisi Otabek Usmonov xabarlarga aniqlik kiritdi.

Unga koʻra, Oʻzbekistonda shakar narxini barqaror saqlash boʻyicha zarur chora-tadbirlar ishlab chiqilgan boʻlib, narxlar keskin oʻsishi boʻyicha xavotirga oʻrin yoʻq.

«Narxlarni barqaror saqlash boʻyicha zarur chora-tadbirlar ishlab chiqilgan boʻlib, narxlar keskin oʻsishi boʻyicha xavotirga oʻrin yoʻq. Shu sababli internet tarmoqlarida tarqatilayotgan toʻliq oʻrganilmagan xabarlarga asosan xavotirga tushmasligingizni soʻrab qolamiz», dedi Raqobatni rivojlantirish va isteʼmolchilar huquqlarini himoya qilish qoʻmitasi raisi maslahatchisi Otabek Usmonov.

Respublikaning dehqon bozorlarida tashkil etilgan elga xizmat rastalari va yirik savdo tarmoqlarida shakar mahsulotining chakana narxi 1 kilogramm uchun 13 000 soʻmdan sotilishi taʼminlanayotgan boʻlsa, boshqa savdo doʻkonlarda oʻrtacha 13 200—15 000 soʻmni tashkil etmoqda.

Shakar mahsulotining birja savdolaridagi narxi oʻtgan yilning mos davriga nisbatan 4 foizga pasaygan boʻlsa, bozorlardagi chakana narx oʻzgarishsiz qolgan.