Senatning Agrar, suv xoʻjaligi masalalari va ekologiya qoʻmitasi raisi A.Tuychiyev Sirdaryo viloyatining Mirzaobod, Oqoltin va Sardoba tumanlarida boʻlib, xalq deputatlari mahalliy Kengashlari joriy faoliyati bilan yaqindan tanishdi.

Tashrif doirasida mahalliy Kengashlarning deputatlik faoliyati, aholi muammolarini oʻrganish va yechimini taʼminlashda Kengash vakolatlaridan samarali foydalanish masalalari muhokama qilindi.

Deputatlar tashabbuskorligini kuchaytirish, aholi murojaatlarini tizimli oʻrganish va uni hal etishda davlat organlari bilan hamkorlikni kengaytirish dolzarb yoʻnalish sifatida qayd etildi.

Shuningdek, mahalliy Kengashlar faoliyatini metodik va tashkiliy jihatdan yanada takomillashtirish, Kengash qarorlarini qonunchilik talablariga muvofiq ravishda qabul qilish, qonunlar muhokamasi va targʻiboti, qonunchilik tashabbuslarini shakllantirish hamda Kengash sessiyalarida masʼul tashkilotlar hisobotlarini eshitish amaliyotini kuchaytirish boʻyicha tegishli tavsiyalar berildi.

Senator, shuningdek, “mahalla yettiligi” vakillari bilan uchrashuv oʻtkazib, mahallada aholi turmush darajasini oshirish, tadbirkorlikni qoʻllab-quvvatlash, kambagʻallikni qisqartirish, ijtimoiy xizmatlar sifatini yaxshilash borasidagi qonunchilik va amaliy tadbirlar haqida maʼlumot berdi.

Joylardagi muammolarni tezkor hal etishda hamjihatlik va masʼuliyatning muhimligi alohida taʼkidlandi.