Oliy Majlis Senati huzuridagi Yoshlar parlamenti aʼzolari Germaniyaning Shimoliy Reyn-Vestfaliyada faoliyat yurituvchi Junge Union NRW yoshlar tashkiloti vakillari bilan onlayn formatda uchrashuv oʻtkazdi.

Uchrashuvda yoshlar siyosati, demokratik institutlar, fuqarolik taʼlimi, raqamlashtirish, yashil energetika, shaharlarni barqaror rivojlantirish va xalqaro hamkorlik masalalari xususida fikr almashildi.

Maʼlumki, Junge Union NRW Germaniyadagi eng yirik yoshlar tashkilotlaridan biri hisoblanadi. Bugungi kunda uning 23 mingdan ortiq aʼzosi boʻlib, asosiy faoliyati yoshlarning siyosiy faolligini oshirish, xalqaro aloqalarni mustahkamlash va yangi tashabbuslarni ilgari surishga qaratilgan.

Muloqot davomida yoshlarning siyosiy jarayonlardagi ishtiroki va xalqaro maydonda faol boʻlishi muhim ahamiyat kasb etishini taʼkidlandi. Xususan, Yoshlar parlamenti raisi Laylo Aslonova Oʻzbekiston yoshlari uchun xalqaro tajribani oʻrganish, qoʻshma tashabbuslar orqali dunyoqarashini kengaytirish va yangi imkoniyatlar yaratish dolzarb ekanini taʼkidlab oʻtdi.

Tomonlar yoshlar almashinuvi dasturlari, innovatsion tashabbuslar va yoshlar orasida fuqarolik ongini rivojlantirishga qaratilgan qoʻshma dasturlarni amalga oshirishga kelishib oldi.