Mamlakatimizning ushbu mintaqadagi Bosh konsulxonasi tomonidan Sankt-Peterburg davlat universitetida “Oʻzbek tilining izohli lugʻati” kitobi taqdimoti oʻtkazildi, deb xabar berdi “Dunyo” AA muxbiri.

Taqdimotda universitet rektorining Xalqaro aloqalar boʻyicha oʻrinbosari Sergey Andryushin, tilshunos olimlar va yosh tadqiqotchilar ishtirok etdi.

Uchrashuv avvalida Bosh konsullik vakillari Oʻzbekiston Respublikasi Fanlar akademiyasining Oʻzbek tili, adabiyoti va folklor leksikografiya instituti tomonidan yaratilgan 5 jildlik “Oʻzbek tilining izohli lugʻati” kitobining yaratilishi va uning oʻzbek tili rivojlanishidagi oʻrni haqida soʻzlab berdi.

Muloqot davomida tomonlar Sankt-Peterburg davlat universiteti qoshida Oʻzbek tili va madaniyati markazini ochish boʻyicha fikr almashdi. Ushbu tashabbus oliy taʼlim muassasasi rahbariyati tomonidan iliq qarshi olindi.

— Universitetimizda Oʻzbek tili va madaniyati markazini ochish taklifini qoʻllab-quvvatlayman, — dedi Sergey Andryushin. — Markaz uchun universitetdan alohida xona ajratiladi. Oʻzbek tili va madaniyati markazining tantanali ochilish marosimi esa yuqori saviyada amalga oshiriladi.

Uchrashuvda markazni zarur jihozlar va oʻzbek tiliga oid adabiyotlar bilan boyitishda hamkorlik masalalari ham koʻrib chiqildi.

Tadbir davomida Bosh konsulxona vakillari universitetga “Oʻzbek tilining izohli lugʻati” kitobini taqdim qildi.