Abdulaziz YOʻLDOSHEV/“Xalq soʻzi”. Prezidentimizning “Zulfiya nomidagi Davlat mukofoti bilan taqdirlash toʻgʻrisida”gi qaroriga muvofiq mukofotlangan bir guruh iqtidorli qizlar orasida samarqandlik Afroʻza Hamdamova ham borligi barchamizni quvontirdi.

Yoshlar oʻrtasida 20-karra Oʻzbekiston chempioni, 15 karra Osiyo chempioni, 7-karra jahon chempioni boʻlgan bu qizni nafaqat mamlakatimizda, balki butun dunyoda bilishadi, desak, mubolagʻa boʻlmaydi.

— Yurtboshimiz mening yutuqlarimni shuncha yuqori baholab Zulfiya nomidagi Davlat mukofoti bilan taqdirladi. Bundan juda mamnunman, — deydi A. Hamdamova. — Kelgusida bunday yuksak ishonchga munosib boʻlishga vaʼda beraman.

Samarqand shahridagi 42-umumiy oʻrta taʼlim maktabining 9-sinf oʻquvchisi Afroʻza Hamdamova sportning shaxmat turi boʻyicha professional darajada shugʻullanib keladi. U FIDE sport ustozligiga nomzodlikni 2017-yilda, FIDE sport ustasini 2022-yilda, ayollar oʻrtasida xalqaro sport ustasi unvonini 2024-yilda qoʻlga kiritgan.

Yosh boʻlishiga qaramasdan keyingi 4-5 yilning oʻzida koʻpgina xalqaro musobaqalar va jahon chempionatlarida muvaffaqiyatli qatnashib kelmoqda. Yutuqlarining ham salmogʻi shunga yarasha.

2023-yilning 12-22-noyabr kunlari Italiyaning Montesilvano shahrida oʻtkazilgan oʻsmirlar oʻrtasidagi jahon chempionatida 14 yoshgacha boʻlgan qizlar oʻrtasida birinchi oʻrinni egallab, xotin-qizlar orasida shaxmat boʻyicha Oʻzbekistonning birinchi jahon chempioni boʻlib tarixga kirdi.

2024-yilning 28-oktyabr — 10-noyabr kunlari Braziliyaning Florianopolis shahrida 16 yoshgacha boʻlgan shaxmatchilar ishtirokida oʻtkazilgan jahon chempionatida birinchi oʻrinni egallab, xotin-qizlar oʻrtasidagi shaxmat boʻyicha Oʻzbekistonning 2 karra jahon chempioni boʻldi.

Afroʻza Hamdamova shaxmatning asosiy — standart yoʻnalishi boʻyicha Oʻzbekistonning ayollar oʻrtasidagi birinchi va hozircha yagona jahon chempioni hisoblanadi.

— Axborot-kommunikatsiya texnologiyalaridan unumli foydalanib, Microsoft Office Excel, Microsoft Office Word dasturlarida ishlashda yetarlicha bilimga ega boʻldim, — deydi A. Hamdamova. — Shu bilan birga, oʻzbek tilidan tashqari fors-tojik, rus va ingliz tillarini ham oʻrgandim. Hozir xitoy, koreys va turk tillarini oʻrganyapman. Bunda menga yaqindan yordam berayotgan ustozlarimga minnatdorlik bildiraman.