25-may kuni Rimdagi Bonapart saroyida moda olamining eng dovruqli fotosuratchilaridan biri Mario Testinoning “Goʻzal dunyo” koʻrgazmasi oʻz ishini boshladi.

Soʻnggi yetti yilni Testino moda olamidan tashqarida yangi mavzularni izlab topishga bagʻishladi. Oʻz ishining mohir ustasi mintaqa xususiyatlarini oʻrgangan holda, mamlakatlarning madaniy qadriyat tizimlaridan ilhomlanib, yangi koʻrgazma asosini tashkil etgan betakror fotosuratlarni toʻpladi.

Koʻrgazmada Mario Testinoning Oʻzbekiston boʻylab amalga oshirgan ekspeditsiyalari mobaynida tasvirga tushirgan asarlari namoyish etilmoqda. Ular orasida Qoraqalpogʻiston, Surxondaryo va Buxoro kelinlari hamda kurashchi polvonning suratlari oʻrin olgan. Shuningdek, taqdimotga Oʻzbekistonda olingan Axaltaka tulporlarining multimedia fotosuratlari ham qoʻyilgan. Loyiha Oʻzbekiston Madaniyat va sanʼatni rivojlantirish jamgʻarmasi madadi bilan tayyorlangan.

Koʻrgazma Bonapart saroyida 25-avgustga qadar muxlislarga muntazir.