27-sentyabr kuni Ispaniya La Ligasi 7-turidan oʻrin olgan “Atletiko Madrid” — “Real Madrid” uchrashuvi kutilmagan natija bilan yakunlandi. “Metropolitano” stadionida oʻtgan derbida maydon egalari yirik hisobda gʻalaba qozondi — 5:2.

Oʻyinning 14-daqiqasida “Atletiko” himoyachisi Robin Le Norman hisobni ochdi. 25-daqiqada “qirollik klubi” yetakchisi Killian Mbappe hisobni tenglashtirdi. 37-daqiqada yosh iqtidorli Arda Guler mehmonlarning ikkinchi golini urdi. Birinchi taymning qoʻshib berilgan daqiqalarida Aleksander Serlot javob goli bilan hisobni 2:2 qildi.

Ikkinchi boʻlimning 51-daqiqasida “Real” darvozasi tomon penalti belgilandi va uni Xulian Alvares aniq amalga oshirdi. 64-daqiqada oʻsha Alvares yana bir bor raqib darvozasini ishgʻol etib, “Atletiko” ustunligini oshirdi. Uchrashuv soʻnggida, 90+4-daqiqada Antuan Grizmann ham oʻz hisobiga gol yozdirib qoʻydi.

Uchrashuv natijasi: “Atletiko” — “Real Madrid” 5:2.
Gollar: Le Norman (14), Serlot (45+3), Alvares (51-pen., 64), Grizmann (90+4) — Mbappe (25), Guler (37).

“Atletiko”: Oblak – Lorente, Le Norman, Langle, Gansko (Galan 83) – Simeone, Koke, Barrios (Baena 90+2), Gonsales (Grizmann 83) – Alvares (Molina 90+2), Serlot (Gallaxer 67).
“Real”: Kurtua – Karvaxal (Kamavinga 59), Militao (Asensio 46), Heysen (Gonsalo 90), Karreras – Guler (Mastantuono 59), Chuameni, Valverde, Vinisius – Bellinghem (Rodrigo 70), Mbappe.

Bu natija “Real Madrid” uchun mavsumdagi ilk magʻlubiyat boʻldi va jamoa chempionlik uchun kurashda jiddiy zarba oldi. “Atletiko” esa derbida katta gʻalaba bilan muxlislarini xursand qildi.