27 сентябрь куни Испания Ла Лигаси 7-туридан ўрин олган «Атлетико Мадрид» — «Реал Мадрид» учрашуви кутилмаган натижа билан якунланди. «Метрополитано» стадионида ўтган дербида майдон эгалари йирик ҳисобда ғалаба қозонди — 5:2.

Ўйиннинг 14-дақиқасида «Атлетико» ҳимоячиси Робин Ле Норман ҳисобни очди. 25-дақиқада «қироллик клуби» етакчиси Киллиан Мбаппе ҳисобни тенглаштирди. 37-дақиқада ёш иқтидорли Арда Гулер меҳмонларнинг иккинчи голини урди. Биринчи таймнинг қўшиб берилган дақиқаларида Александер Серлот жавоб голи билан ҳисобни 2:2 қилди.

Иккинчи бўлимнинг 51-дақиқасида «Реал» дарвозаси томон пеналти белгиланди ва уни Хулиан Альварес аниқ амалга оширди. 64-дақиқада ўша Альварес яна бир бор рақиб дарвозасини ишғол этиб, «Атлетико» устунлигини оширди. Учрашув сўнггида, 90+4-дақиқада Антуан Гризманн ҳам ўз ҳисобига гол ёздириб қўйди.

Учрашув натижаси: «Атлетико» — «Реал Мадрид» 5:2.
Голлар: Ле Норман (14), Серлот (45+3), Альварес (51-пен., 64), Гризманн (90+4) — Мбаппе (25), Гулер (37).

«Атлетико»: Облак – Лоренте, Ле Норман, Лангле, Ганцко (Галан 83) – Симеоне, Коке, Барриос (Баэна 90+2), Гонсалес (Гризманн 83) – Альварес (Молина 90+2), Серлот (Галлахер 67).
«Реал»: Куртуа – Карвахал (Камавинга 59), Милитао (Асенсио 46), Ҳейсен (Гонсало 90), Каррерас – Гулер (Мастантуоно 59), Чуамени, Валверде, Винисиус – Беллингҳэм (Родриго 70), Мбаппе.

Бу натижа «Реал Мадрид» учун мавсумдаги илк мағлубият бўлди ва жамоа чемпионлик учун курашда жиддий зарба олди. «Атлетико» эса дербида катта ғалаба билан мухлисларини хурсанд қилди.