Foto: Instagram

Oʻzbekistonlik UFC jangchisi Ramazon Temirov Qozogʻiston vakili Asu Almabayevga qarshi oktagonga chiqadi. Bu maʼlumotni sportchining oʻzi va murabbiyi Instagramʼdagi sahifalari orqali tasdiqladi.

“Hamma shu jangni kutgan edi shekilli, duoda boʻlinglar, azizlarim!” deb yozgan Temirov.

Maʼlum boʻlishicha, ushbu bellashuv joriy yilning 26-iyul kuni Abu-Dabi mezbonlik qiladigan UFC Fight Night turini doirasida tashkil etiladi.

Qayd etish joiz, oʻzbekistonlik sportchi oʻzining soʻnggi jangini joriy yilning mart oyida amerikalik Charlz Jonsonga qarshi oʻtkazib, ochkolar hisobiga koʻra gʻalaba qozongan edi. U faoliyati davomida 22-marta oktagonga koʻtarilgan boʻlib, janglarining 19 tasida raqiblaridan ustun kelgan, faqat 3 ta bahsda magʻlubiyat alamini tatib koʻrgan.

Almabayev esa shu kunga qadar professional MMAʼda 24 ta jang oʻtkazgan. Qozogʻiston sportchisi bahslarining 21 tasida gʻalaba qozonib, 3 tasida imkoniyatni boy berib qoʻygan. U oxirgi jangini aynan Ramazon Temerov ishtirok etgan turnirda portugaliyalik Manel Keypega qarshi oʻtkazib, nokaut bilan magʻlub boʻlgandi.