Botir MADIYOROV/“Xalq soʻzi”. Yaqin yillargacha Fargʻona viloyatining Qoʻshtepa tumanida maktabgacha taʼlimga qamrov koʻrsatkichi qoniqarsiz edi. Bu boradagi ezgu tashabbuslar doirasida oʻtgan qisqa davrda tumanning barcha hududlarida koʻplab zamonaviy bogʻchalar bunyod etildi. Eski bogʻchalar mukammal taʼmirdan chiqarildi, davlat-xususiy sheriklik tamoyili boʻyicha yangi taʼlim muassasalari foydalanishga topshirildi.

Ayni jarayondagi ishlar izchil davom ettirilayotgani natijasida Investitsiya dasturi asosida tumanning “Shomirza” va “Shahartepa” MFY hududida shu kunlarda 2 ta zamonaviy bogʻcha ish boshladi. Xususan, 30-davlat maktabgacha taʼlim tashkilotiga 150 oʻrinli bino qurilishi uchun 4,5 mlrd. soʻm, 20-davlat maktabgacha taʼlim tashkilotiga oshxona qurish va binolar rekonstruksiyasi uchun 3,9 mlrd. soʻm sarflandi.

— Ikkita zamonaviy bogʻcha toʻliq ishga tushgani natijasida tumanda maktabgacha taʼlimga qamrov koʻrsatkichi 86 foizga yetkazildi, — deydi Qoʻshtepa tumani maktabgacha va maktab taʼlimi boʻlimi bosh mutaxassisi Shuhratjon Usmonov. — Bu yil yana bitta bogʻchada Investitsiya dasturi boʻyicha mukammal taʼmirlash ishlarini amalga oshirish hamda “Mening bogʻcham” loyihasi doirasida bitta yangi bogʻcha qurilishi rejalashtirilgan.

Bu tumanda ushbu yoʻnalishdagi qamrovni 90 foizdan oshirish imkonini beradi.