Joriy yilda koronavirus pandemiyasi xavfini pasaytirish, xalqimizning bu ofatdan sogʻ-omon olib chiqish, talafotlarni imkon qadar kamaytirish borasida davlatimiz tomonidan oʻz vaqtida koʻrilgan chora-tadbirlar tufayli 2020-yilgi davlat byudjeti parametrlari ijrosi taʼminlandi. “2021-yil uchun Oʻzbekiston Respublikasining Davlat byudjeti toʻgʻrisida”gi qonun loyihasi kelgusi yilda ham koronavirus pandemiyasi davom etishi ehtimoli mavjudligini eʼtiborga olgan holda ishlab chiqilgani ahamiyatlidir.

Chunki koronavirus pandemiyasi xavfi hali yoʻqolgani yoʻq. Biz uning har qanday xurujlariga tayyor turishimiz, zarur boʻlganda aniq chora-tadbirlar koʻrishimiz lozim.

Shu jihatdan olganda koronavirus pandemiyasi va boshqa yuqumli kasalliklarga tashxis qoʻyish, tez aniqlashda viloyat markazlari, tumanlarda jiddiy muammolar mavjudligidan koʻz yuma olmaymiz. Bu muammo joylarda MRT diagnostika apparatlarining yetishmasligi bilan bogʻliqdir. Oʻzim guvoh boʻlganimdek, MRT apparatlari xususiy klinikalarda mavjud boʻlib, unga koʻrinish uchun aholi katta miqdorda pul sarflashga majbur boʻlishyapti. Nochor oilalar bor, kam taʼminlanganlar, koʻp bolali onalar kasallik xavfi sezilganda MRT apparatiga qimmat boʻlsa ham, qarz-qavala qilib, tushishga majbur boʻlyapti.

Mening taklifim – 2021-yilga moʻljallangan davlat byudjeti parametrlarini belgilashda davlat byudjeti hisobidan shahar va tuman kasalxonalari MRT apparatlari bilan taʼminlansa, aholi uchun katta qulaylik yaratgan boʻlamiz. Albatta, bu apparatlar xarid qilinsa, nafaqat koronavirusga, balki kelgusida boshqa koʻplab kasalliklarga tashxis qoʻyishda ham foydalanish imkoniyati yaratiladi.

Mavluda Ibragimova,
Oliy Majlis Qonunchilik palatasi deputati,
OʼzLiDeP fraksiyasi aʼzosi.