Illyustrativ foto

Qirgʻiziston Savdo-sanoat palatasi rahbari, mamlakatning sobiq bosh vaziri Temir Sariyev oʻz mamlakati fuqarolariga Rossiyada alohida maqom berilishini talab qildi. Bu haqda u Sankt-Peterburg xalqaro iqtisodiy forumida maʼlum qildi.

“Biz Qirgʻiziston, qirgʻiz xalqi Rossiya Federatsiyasida alohida maqomga ega boʻlishini istaymiz. Chunki eng ogʻir damlarda siz bilan birga boʻlganmiz”, — degan Sariyev.

U qirgʻiz xalqi Ulugʻ Vatan urushi yillarida Moskvani himoya qilganini alohida taʼkidladi. Maxsus operatsiya boshlanganda ham ular Rossiyani qoʻllab-quvvatlagan.

Shu yilning 12-iyun kuni Qirgʻiziston maxsus xizmatlari rossiyalik relokantlar (ish sabablari yoki yaxshi imkoniyatlarni izlash uchun koʻchib oʻtadigan odamlar)ni deportatsiya qilish maqsadida emas, balki ichki siyosiy vaziyat keskinlashgani sababli noqonuniy muhojirlarni aniqlash boʻyicha maxsus operatsiya oʻtkazgani xabar qilingan edi. Siyosatshunos Mars Sariyevning aytishicha, oxirgi paytlarda ular Hindiston va Pokistonga qarshi kayfiyatni koʻtarish orqali respublikadagi vaziyatni beqarorlashtirishga harakat qilishgan. Natijada Pokiston va Hindiston fuqarolariga hujumlar boshlangan. Shu bois muhojirlarga qarshi reydlar oʻtkazilgan.