Foto: Samarqand viloyati Ekologiya boshqarmasi

Samarqand va Qashqadaryo viloyatlari chegarasida joylashgan Kunkoʻrmas dovonining Qashqadaryo viloyati hududida Oʻrta Osiyo qoʻngʻir ayiqlari choʻponlarning 4 bosh echkisini yeb qoʻydi. Bu haqda Samarqand viloyati Ekologiya boshqarmasi matbuot xizmati xabar berdi.

Maʼlum qilinishicha, mazkur holat Samarqand viloyati Ekologiya, atrof-muhitni muhofaza qilish va iqlim oʻzgarishi boshqarmasi va uning Urgut tumani inspeksiyasi davlat inspektorlari tomonidan tezkor tartibda nazoratga olingan.

Aniqlanishicha, Suv sathidan 2500-2700 metr balandlikdagi ushbu yovvoyi tabiatga tegishli boʻlgan ayiqlarning yashash manzilida Urgut tumani Soygʻus MFYning choʻponlari ijara asosida mol qoʻylarini boqayotganda noyob tur hisoblangan Oʻrta Osiyo qoʻngʻir ayiqlari 4 bosh echkini yeb qoʻygan. Choʻponlarga yoki ayiqlarga talafot yetmagan.

Shuningdek, mahalliy aholining taʼkidlashicha, 2 kun burun kechasida ayiqlar Soygʻus MFYga 2-3 kilometr yaqinlikdagi togʻ bagʻrida oʻsuvchi mevali daraxtlarni yeyish uchun tushib kelgan.

«Hozirda tegishli mutaxassislar tomonidan holat nazoratga olinib oʻrganish ishlari davom etmoqda», deyiladi xabarda.