Foto: Videodan kadr

Qashqadaryo viloyatida “Labo” haydovchisi mast fuqaroni urib yuborib, paxta dalasiga tashlab ketdi. Bu haqda “Ovoza” dasturida xabar berildi.

Bildirilishicha, marhum tumanning Qoraquchchi mahallasida yashagan. U kechki soat 00:30 atrofida onasining uyidan mast holda chiqqan va uni mashina urib ketgan.

IIO tomonidan olib borilgan surishtiruvlarda YTHni Qarshi tumanida yashovchi Labo haydovchisi sodir etgani aniqlangan.

“Haydovchi piyodani urib yuborganidan soʻng uni avtomobiliga ortib, mahalladagi paxta maydoni yoqasiga tashlab ketgan. Oqibatda u tez tibbiy yordam koʻrsatilmagani sababli vafot etgan”, deyiladi videolavhada.

Qayd etilishicha, hozirgi kunda mazkur holat yuzasidan Jinoyat kodeksining 266-moddasi 2-qismi (Transport vositalari harakati yoki ulardan foydalanish xavfsizligi qoidalarini buzish odam oʻlimiga sabab boʻlsa) va 117-moddasi 2-qismi (Xavf ostida qoldirish odam oʻlimiga sabab boʻlsa) bilan jinoyat ishi qoʻzgʻatilgan. Gumonlanuvchi protsessual tartibda ushlanib, unga qamoq ehtiyot chorasi qoʻllangan. Hozirda tergov harakatlari olib borilmoqda.