“Qamchiq” dovoni YPX maskanida oʻtkazilgan tezkor tadbirda katta miqdordagi noqonuniy tamaki mahsulotlarini olib ketayotgan shaxs toʻxtatib qolindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar qildi.

Qayd etilishicha, Departamentning Pop tumani boʻlimi va IIB xodimlari hamkorligida “Qamchiq” dovoni YPX maskanida oʻtkazilgan tezkor tadbirda tamaki mahsulotlarining noqonuniy savdosi bilan shugʻullanib kelgan fuqaro M.Sh.ning (muqaddam sudlangan) boshqaruvidagi “Lacetti” rusumli avtomashinasi toʻxtatilib koʻzdan kechirilganda avtomashina salonida xorijiy davlatlarda ishlab chiqarilgan 5 000 quti aksiz markasiz tamaki mahsulotlari borligi aniqlangan.

Maʼlumotlarga koʻra, ushbu shaxs mahsulotlarni Toshkent shahriga sotish maqsadida olib ketayotganligi aniqlanib, ular ashyoviy dalil sifatida olingan.

Mazkur holat yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda muomalaga kiritish yoki ishlab chiqarish) bilan jinoyat ishi qoʻzgʻatilib, tergov harakatlari oʻtkazilmoqda.