Oʻzbekiston Respublikasi Prezidenti Shavkat Mirziyoyev 9-iyun kuni Toshkent xalqaro investitsiya forumida ishtirok etish uchun mamlakatimizga kelgan BRIKS Yangi taraqqiyot banki prezidenti Dilma Rusefni qabul qildi.

Ushbu koʻp tomonlama moliyaviy institut bilan amaliy hamkorlikni rivojlantirish masalalari muhokama qilindi.

Oʻtgan yil oktyabr oyidagi BRIKS sammiti doirasida erishilgan kelishuvlar izchil amalga oshirilayotgani mamnuniyat bilan qayd etildi.

Xususan, bankning Boshqaruvchilar kengashi tomonidan Oʻzbekiston Yangi taraqqiyot bankiga aʼzo boʻlishiga prinsipial rozilik berildi. Umumiy qiymati 5 milliard dollarlik birinchi navbatdagi qoʻshma loyihalar dasturi shakllantirildi.

Davlatimiz rahbari irrigatsiya tizimlarini modernizatsiya qilish, togʻ-kon sanoatini rivojlantirish, xususiy sektorni moliyalashtirish, taʼlim va infratuzilma sohalarida davlat-xususiy sheriklikni ilgari surish kabi ustuvor yoʻnalishlarda loyihalarni tez fursatda tayyorlash va amalga oshirish muhimligini taʼkidladi.

Shuningdek, yirik mintaqaviy infratuzilma loyihalari qoʻllab-quvvatlandi.