Parlamentlararo ittifoq 151-assambleyasining “Inqiroz sharoitida insonparvarlik meʼyorlariga rioya qilish va insonparvarlik harakatlarini qoʻllab-quvvatlash” mavzusidagi yalpi majlisida Oliy Majlis Senati Raisi Tanzila Narbayeva boshchiligidagi Oʻzbekiston parlament delegatsiyasi ishtirok etdi.

Senat Raisi oʻz chiqishida dunyoda kechayotgan turli nizolar, inqirozlar va gumanitar tahdidlar millionlab insonlarning hayotiga jiddiy salbiy taʼsir koʻrsatayotganini taʼkidladi. Bunday sharoitda parlamentlar insonparvarlik tamoyillarini ilgari surish va inson hayotini asrashda hal qiluvchi rol oʻynashi zarurligi alohida qayd etildi.

Assambleyada Oʻzbekistonning insonparvarlik sohasidagi tashabbuslari ilgari surildi. Taʼkidlanganidek, hozirgi kunda dunyo boʻylab 120 dan ziyod qurolli toʻqnashuvlar natijasida 310 millionga yaqin insonlar yordamga muhtoj boʻlib, bu insonparvarlik meʼyorlariga rioya qilish masalasini yana-da dolzarb etmoqda.

Oʻzbekiston xalqaro insonparvarlik harakatlarida faol ishtirok etib, notinch mintaqalardagi muhtoj aholiga uy-joy, tibbiy xizmat va ijtimoiy koʻmak koʻrsatish orqali amaliy yordam bermoqda. Bu saʼy-harakatlar mamlakatimizning insonparvarlik va xalqaro hamjihatlik tamoyillariga sodiqligini yaqqol namoyon etmoqda.

Majlis doirasida parlamentlar oʻrtasida qonunchilik va raqamli hamkorlikni chuqurlashtirish, gumanitar resurslarni samarali va manzilli yoʻnaltirish, global tashabbuslarga moliyaviy ishtirokni kengaytirish, shuningdek, insonparvarlik sohasida yuqori malakali kadrlar tayyorlashga oid aniq takliflar ham ilgari surildi.

Taʼkidlanganidek, insonparvarlik – tinchlikning huquqiy kafolati, barqaror taraqqiyotning maʼnaviy poydevoridir. Shu bois, bu jarayonda parlamentlarning roli tobora oshib bormoqda.