Eron poytaxti Tehron shahrida para taekvondo boʻyicha Osiyo taekvondo federatsiyasi prezidenti kubogi davom etmoqda.

Eʼtiborlisi, ayollar oʻrtasidagi musobaqalarda ishtirok etgan ikki hamyurtimiz – Ziyoda Isoqova hamda Guljanoy Naimovalar yakunda oltin medalga sazovor boʻlishdi.

-47 kg. vazn toifasidagi bahslarda dayanga chiqqan Ziyoda Isoqova yarim finalda ham, finalda ham mezbon yurt Eron sportchisini magʻlubiyatga uchratdi va gʻoliblikni qoʻlga kiritdi.

Tokio-2020 Paralimpiya oʻyinlari chempioni Guljanoy Naimova esa +65 kg. vazn toifasida dunyoda tengsiz ekanligini yana bir marotaba isbotladi. Isteʼdodli sportchimiz yarim finalda Eron, finalda esa serbiyalik para taekvondochiga qarshi dayanga chiqdi va har ikki raqibasini ham ishonchli tarzda yengib, oltin medal sohibasiga aylandi.

Eʼtiborli jihati, Guljanoy Naimova musobaqaning eng yaxshi ayol sportchisi nomiga ham munosib koʻrildi. Terma jamoamiz murabbiyi Bobur Qoʻziyev ham oʻz yoʻnalishida eng yaxshi deb topildi.

Shu tariqa ayollar oʻrtasidagi bahslarda terma jamoamiz umumjamoa hisobida 1-oʻrinni egalladi va maxsus kubok bilan taqdirlandi.

Darvoqe, Osiyo taekvondo federatsiyasi prezidenti kubogidagi gʻalaba Guljanoy Naimova uchun qatorasiga toʻrtinchi oltin medalga aylandi. Bungacha u 2021-yil iyun oyida Oman davlatida oʻtgan Osiyo ochiq chempionati, Tokio-2020 yozgi Paralimpiya oʻyinlari, oʻtgan yilning dekabr oyida Turkiyada oʻtkazilgan Jahon chempionatida ham oltin medalga sazovor boʻlgan edi. 

Endi ular qatoriga Tehronda oʻtkazilgan Osiyo taekvondo federatsiyasi prezidenti kubogi oltin medali ham qoʻshildi.