Foto: Muhsin Umurzoqov / “Xalq soʻzi”

Oʻzbekistonda havo sifati yana yomonlashishi va joriy hafta soʻngiga qadar saqlanib turishi kutilmoqda. Bu haqda “Oʻzgidromet” xabar berdi.

Prognozlarga koʻra, yogʻingarchiliklardan soʻng mamlakatimizda ob-havo haroratining nisbatan iliqlashishi fonida atmosferada inversiya jarayonlari yana faollashmoqda. Shu bois pastki atmosfera qatlamlarida mayda dispers zarrachalar — PM2,5 va PM10 toʻplanib qolishi va ayrim hududlarda ular konsentratsiyasi oshishi mumkin.

Maʼlum qilinishicha, mazkur jarayon respublikaning koʻplab hududlarida, jumladan Toshkent shahri, Samarqand va Jizzax viloyatlarida ayniqsa yaqqol namoyon boʻlib, ertalab, kechqurun va tungi soatlarda atmosferaning pastki qatlamlarida havo almashinuvining cheklanishiga olib kelmoqda. Natijada ifloslantiruvchi moddalarning tarqalishi qiyinlashadigan noqulay meteorologik sharoit shakllanmoqda.

Tabiiy-geografik joylashuvi, relyef xususiyatlari va sinoptik sharoitlariga koʻra, Oʻzbekiston hududi umumiy holda atmosfera inversiyasi tez-tez va deyarli doimiy kuzatiladigan mintaqalar qatoriga kiradi.

Dastlabki prognozlarga koʻra, respublika boʻylab iliq ob-havo harorati hamda inversiya jarayoni mazkur haftaning oxirigacha saqlanib turishi kutilmoqda.