Foto: Akmal Muhammadov / “Xalq so‘zi”

O‘zbekiston Respublikasi Fanlar akademiyasi huzuridagi Genomika va bioinformatika markazi zamonaviy ilmiy izlanishlar va ularni amaliyotga tatbiq etish bilan shug‘ullanadi. Markaz qishloq xo‘jaligi o‘simliklari genomlarini o‘rganish, xo‘jalik ahamiyatiga ega bo‘lgan genlarni tahlil qilish va yangi innovasion usullarni joriy etishda muhim ahamiyat kasb etadi.

Muassasa tomonidan g‘o‘za, bug‘doy, soya, sholi, anor va uzum navlari uchun gen muhandisligi va genom texnologiyalari qo‘llanib, kasalliklar va stress omillariga chidamli yangi navlar yaratish bo‘yicha tadqiqotlar olib borilmoqda. Shuningdek, gen va hujayra muhandisligi, markerlarga asoslangan seleksiya, genom va virtual seleksiya dasturlari ishlab chiqilmoqda.

Markaz tarkibida 6 ta laboratoriya, Personallashtirilgan qishloq xo‘jaligi ekinlarini o‘rganish bo‘limi, shuningdek, genetik o‘zgartirilgan organizmlar va ularning mahsulotlarini test qilishga ixtisoslashgan Milliy muvofiqlashtirish markazi faoliyat yuritadi.

Shuningdek, Toshkent viloyatida joylashgan maxsus urug‘chilik xo‘jaligi, issiqxona, fitotron hamda noyob germaplazma ob’yektlari Markaz ilmiy tadqiqotlarining muhim tarkibiy qismidir. Ushbu muassasa O‘zbekistonda biotexnologiya va qishloq xo‘jaligini yanada rivojlantirishga katta hissa qo‘shmoqda.

Foto: Akmal Muhammadov / “Xalq so‘zi”