2024-yil 1-dekabr holatiga koʻra, Oʻzbekistonda 563 ming 15 ta yuridik shaxs faoliyat koʻrsatmoqda. Yilning ushbu davrida roʻyxatdan oʻtgan yangi yuridik shaxslar soni esa 76 ming 234 tani tashkil etdi. Bu haqda “Fiskal tahlillar” kanali xabar berdi.

Faoliyat koʻrsatayotgan yuridik shaxslar soni boʻyicha savdo sohasida yetakchilik qildi. Mamlakat boʻylab 146,8 mingta savdo bilan shugʻullanayotgan yuridik shaxs faoliyat yuritmoqda. Qishloq, oʻrmon va baliq xoʻjaligi sohasida esa 127,3 mingta yuridik shaxs roʻyxatdan oʻtgan boʻlib, bu qishloq xoʻjaligi sohasining iqtisodiyotdagi ahamiyatini tasdiqlaydi.

Sanoat sohasi ham oʻz oʻrniga ega boʻlib, 65,8 mingta yuridik shaxs ushbu yoʻnalishda faoliyat yurityapti. Qurilish sohasida esa 32,3 mingta yuridik shaxs faoliyat olib borayotgani qayd etilgan. Yashash va ovqatlanish boʻyicha xizmatlar sohasi esa 28,4 mingta yuridik shaxs bilan beshtalikni yakunlamoqda.

Hududlar kesimida ham yuridik shaxslar soni boʻyicha koʻrsatkichlar yuqori. Toshkent shahri 103 ming 141 nafar yuridik shaxs bilan yetakchilik qildi. Shuningdek, Samarqand (53 ming 268 ta), Fargʻona (49 ming 647 ta) va Qashqadaryo (43 ming 824 ta) viloyatlari bu borada oldinda joylashgan.

Izoh sifatida shuni qayd etish joizki, bank operatsiyalarini amalga oshirmagan va soliq hisobotlarini taqdim etmagan tijorat tashkilotlari avtomatik ravishda nofaol holatga oʻtkaziladi. Ushbu tartib yuridik shaxslar faoliyatini monitoring qilish va nazoratni kuchaytirishga xizmat qiladi.