Strategik islohotlar agentligi tomonidan vazirlik va idoralar vakillaridan iborat ishchi guruh bilan hamkorlikda “tungi iqtisodiyot”ni rivojlantirish chora-tadbirlarini nazarda tutuvchi Prezident qarori loyihasi ishlab chiqildi.

Hujjatda MDH, SHHT, Yevropa Ittifoqi va boshqa davlatlar tajribasi oʻrganilgan boʻlib, tadbirkorlar bilan ham maslahatlashuvlar oʻtkazilgan. Loyiha 2030-yilgacha boʻlgan davrda yangi xizmat imkoniyatlarini yaratish, tungi iqtisodiyotning YIMdagi ulushini oshirish va bandlikni taʼminlashni maqsad qilib qoʻygan.

Rejalarga koʻra:

— 2030-yilga borib 24/7 faoliyat yurituvchi koʻchalar va hududlar soni 320 taga, tungi rejimda ishlaydigan kafe va restoranlar 8 mingga, savdo va xizmat koʻrsatish nuqtalari esa 14,2 mingga yetkaziladi.

— Tungi avtobus kruizlari yoʻlga qoʻyiladi, ular orqali aholiga va turistlarga shaharning diqqatga sazovor joylari va tungi muhitini tanishtirish koʻzda tutilmoqda.

— 24/7 hududlarni aeroport va vokzallar bilan bogʻlovchi maxsus tungi avtobus yoʻnalishlari ham tashkil qilinadi.

— “Tungi iqtisodiyot” raqamli platformasi ishga tushirilib, u orqali turistlar va aholiga tungi obyektlar, transport va boshqa xizmatlar haqida maʼlumot beriladi.

Loyihada mahalliy brendlarni qoʻllab-quvvatlash, ularning filiallari uchun xodimlarni qayta tayyorlash xarajatlarini qisman qoplab berish, reklama va yoritish xarajatlarini kamaytirish kabi choralar ham koʻzda tutilgan.

Shuningdek, “tungi iqtisodiyot menejeri” lavozimi joriy etilib, u 24/7 hududlarni boshqarish, biznes faoliyatni qoʻllab-quvvatlash va madaniy tadbirlarni tashkil qilish bilan shugʻullanadi. 24/7 hududlarni maxsus boshqaruv kompaniyalari masʼuliyatiga topshirish, xavfsizlikni taʼminlash uchun intellektual kuzatuv tizimlarini oʻrnatish rejalashtirilmoqda.

Dastlabki hisob-kitoblarga koʻra, bu choralar natijasida 11 mingdan ortiq yangi ish oʻrinlari yaratiladi hamda yiliga 200 mingga yaqin tashrif buyuruvchilar va turistlar jalb qilinadi.

“Tungi iqtisodiyot” konsepsiyasi 2025–2026-yillarda amalga oshiriladigan “yoʻl xaritasi” bilan tasdiqlanishi kutilmoqda.