Joriy yilning 15-dekabr kuni “Oʻzbekiston-Qatar” va “Qatar-Oʻzbekiston” hamkorlik boʻyicha parlamentlararo guruhlari aʼzolari oʻrtasida oʻzaro hamkorlik aloqalarini mustahkamlash masalalariga bagʻishlangan onlayn muloqot oʻtkazildi.

Uchrashuvda Oʻzbekiston va Qatar oʻrtasidagi munosabatlar hamisha oʻzaro ishonch va hurmat tamoyillari asosida izchil rivojlanib borayotgani taʼkidlandi.

Muloqot davomida parlamentlararo hamkorlikni rivojlantirish masalalariga alohida eʼtibor qaratildi. Xususan, doʻstlik guruhlari oʻrtasida muntazam uchrashuvlar oʻtkazish, qonunchilik masalalari boʻyicha fikr almashish, qoʻshma tashabbuslarni muhokama qilish muhimligi taʼkidlandi.

Shuningdek, qonun ijodkorligi sohasida tajriba almashish, tegishli qoʻmita va komissiyalar oʻrtasida hamkorlikni yoʻlga qoʻyish, yosh parlament aʼzolari uchun malaka oshirish dasturlarini tashkil etish masalalari muhokama qilindi.

Uchrashuv yakunida tomonlar bunday muloqotlar Oʻzbekiston va Qatar oʻrtasidagi parlamentlararo aloqalarni yanada chuqurlashtirishga xizmat qilishini qayd etib, hamkorlikni izchil davom ettirishga kelishib oldilar.