Bugun butun dunyo nigohi O‘zbekistonga qaratilgan. Samarqand shahri UNESCO Bosh konferensiyasining 43-sessiyasini o‘tkazish joyi sifatida rasman tasdiqlandi. Ushbu holat O‘zbekiston tarixiga muhim voqealardan biri sifatida muhrlanib qolishi, shubhasiz. Chunki mazkur nufuzli anjuman ilk bor Parijdan tashqarida o‘tkaziladi. Bu nafaqat mamlakatimizning xalqaro miqyosdagi obro‘sini oshiradi, balki O‘zbekistonning ochiqligi, madaniy boyligi va global jarayonlardagi faol ishtirokini yana bir bor amalda namoyon etadi.

Bu qaror ijodiy industriya vakillarining mashaqqatli mehnati, xalq diplomatiyasi va eng yuqori darajadagi muzokaralar natijasida qo‘lga kiritildi. UNESCO — madaniyat, ta’lim, fan va merosni asrash sohalarida dunyodagi eng muhim tashkilotlardan biri sifatida tan olingan bo‘lib, 43-konferensiyasining Samarqandda o‘tkazilishi xalqaro hamjamiyatning O‘zbekiston taraqqiyotiga bo‘lgan ishonchini yanada oshirib yubordi.

Samarqand — ming yillik tarixga ega shahar, Sharq va G‘arb madaniyatlari tutashgan muqaddas maskan sifatida dunyoga mashhur. Registon maydoni, Shohi Zinda maqbarasi, Bibixonim masjidi kabi tarixiy obidalar nafaqat O‘zbekistonning, balki butun insoniyatning madaniy merosi sifatida e’tirof etilgan. Shu bilan birga, Samarqand so‘nggi yillarda xalqaro anjumanlar hamda konferensiyalarni muvaffaqiyatli o‘tkazishga mos zamonaviy infratuzilmaga ega bo‘ldi. Turizm va logistika sohasidagi jadal o‘zgarishlar esa shaharni yanada jozibador qilmoqda.

UNESCO kabi nufuzli tashkilotning O‘zbekistonga e’tibor qaratishi mamlakatimizni global madaniy jarayonlarda yetakchi davlatlardan biriga aylantirishga xizmat qiladi. Bu O‘zbekistonning dunyo miqyosidagi mavqeini mustahkamlashda muhim qadamdir.

Samarqandga dunyoning turli burchaklaridan yuqori martabali mehmonlar, ekspertlar hamda delegatlar tashrif buyurishi kutilmoqda. Bu nafaqat shahar, balki butun mamlakatimizni turistik va investitsion jihatdan yanada jozibador qiladi.

Anjuman O‘zbekiston madaniyati va san’atining xalqaro miqyosda kengroq o‘rganilishi va qadrlanishiga ham zamin yaratadi. Bu esa milliy merosimizni dunyoga tanitishda yangi imkoniyatlarni ochadi. Tadbirda ishtirok etuvchi tashkilotlar hamda mutaxassislar bilan hamkorlik aloqalari kengayadi. O‘zbekiston ijodiy sohalarda yangi loyihalar va tashabbuslarni amalga oshirish uchun qulay sharoitlar yaratiladi.

An’anaviy tarzda Samarqandda bo‘lib o‘tayotgan “Sharq taronalari” xalqaro musiqa festivallarida har yili dunyoning 70 dan ziyod davlatidan nufuzli mehmonlarning tashrif buyurayotganligi, UNESCO ro‘yxatiga kiritilgan tarixiy obidalar, shuningdek, “Buyuk Ipak yo‘li” xalqaro turizm markazining barpo etilganligi O‘zbekistonning boy milliy-madaniy tarixi, buguni va kelajagidan dalolat beradi.  

UNESCO Bosh konferensiyasining Samarqandda o‘tkazilishi O‘zbekiston uchun nafaqat bugungi kunda muhim ahamiyatga ega, balki kelajakda yanada nufuzli xalqaro tadbirlarni qabul qilish imkonini beruvchi muhim poydevor bo‘lib xizmat qiladi. Mamlakatimiz xalq diplomatiyasi orqali madaniy va ilmiy hamkorlikni mustahkamlash, ta’lim va fan sohasida rivojlanishni jadallashtirish, shuningdek, milliy merosni targ‘ib qilishda katta yutuqlarga erishadi. Samarqand esa ushbu konferensiya orqali nafaqat tarixiy merosga ega shahar sifatida, balki zamonaviy xalqaro tadbirlar markazi sifatida ham o‘z mavqeini mustahkamlaydi. Bu – O‘zbekistonning madaniy-gumanitar diplomatiyasi yuksalishining yangi bosqichi bo‘lib, mamlakatimiz uchun tarixiy burilish nuqtasi sifatida qayd etiladi.

O‘zbekiston uchun bu ulkan imkoniyat nafaqat bugungi yutuqlarning, balki kelajakdagi muvaffaqiyatlarning ramziga aylanadi. Samarqandda o‘tadigan UNESCO Bosh konferensiyasi — mamlakatimizning dunyodagi nufuzli davlatlar qatoridan munosib o‘rin egallashi yo‘lidagi muhim qadamdir.

Dilshodbek XOLMATOV,

Namangan davlat universiteti prorektori.