Arxiv foto

Futbol boʻyicha yoshlar oʻrtasida 2025-yil oʻtkaziladigan Osiyo kubogining saralash bosqichiga qurʼa tashlandi. Kuala-Lumpurda oʻtkazilgan marosimda Oʻzbekiston terma jamoasi «B» guruhidan oʻrin oldi.

Shunday qilib, jamoamizga Kambodja, Nepal, Xitoy Taypeyi va Bahrayn yoshlari raqiblik qiladigan boʻldi.

Qurʼaga koʻra 1-turda vakillarimiz dam oladi. Ikkinchi turda esa yosh futbolchilarimiz Kambodja, 3-turda Nepal, 4-turda Xitoy Taypeyi, 5-turda Bahrayn yoshlari bilan bellashadi.

Oʻzbekistonlik yoshlar amaldagi Osiyo kubogi gʻolibi hisoblanadi. Jamoamiz 2023-yilda yurtimizda oʻtkazilgan turnir finalida Iroqlik tengqurlarini yengib, kubokni qoʻlga kiritgan edi.

Saralash oʻyinlari joriy yilning 21-29-sentyabr kunlari Xitoy Taypeyida boʻlib oʻtadi. Uning natijalariga koʻra, 10 ta guruh gʻolibi va guruhda ikkinchi oʻrinni egallagan eng yaxshi 5 jamoa 2025-yilning 6 — 23-fevral kunlari Xitoyda oʻtkaziladigan Osiyo kubogida qatnashadi.

Oldinroq, Oʻzbekiston U-17 terma jamoasining Osiyo kubogi saralash bosqichidagi raqiblari maʼlum boʻlgani haqida xabar bergandik.