Oʻzbekiston Respublikasi Prezidenti Shavkat Mirziyoyev 15-aprel kuni “Markaziy Osiyo – Koʻrfaz arab davlatlari hamkorlik kengashi” strategik muloqoti boʻyicha vazirlarning ikkinchi uchrashuvida ishtirok etish uchun mamlakatimizga kelgan Ozarbayjon Respublikasi tashqi ishlar vaziri Jayxun Bayramovni qabul qildi.

Uchrashuv avvalida vazir davlatimiz rahbariga Ozarbayjon Prezidenti Ilhom Aliyevning salomi va ezgu tilaklarini yetkazdi.

Oʻzbekiston-Ozarbayjon strategik sheriklik munosabatlari va koʻp qirrali hamkorligini yanada kengaytirish masalalari koʻrib chiqildi.

Oliy darajadagi kelishuvlarni amalga oshirish hamda hamkorlikning 10 ta yangi yoʻnalishi boʻyicha istiqbolli loyihalar portfelini shakllantirishga alohida eʼtibor qaratildi.

Muntazam va samarali muloqotlar tufayli ikki tomonlama munosabatlar sifat jihatidan yangi darajaga chiqqani, amaliy mazmun bilan boyigani mamnuniyat ila qayd etildi.

Oʻtgan yilda tovar ayirboshlash 27 foizga oshdi. Avtomobilsozlik, elektrotexnika, energetika, toʻqimachilik va qishloq xoʻjaligi tarmoqlarida kooperatsiya loyihalari amalga oshirilmoqda. Qoʻshma investitsiya fondi oʻz faoliyatini boshladi.Boʻlajak oliy darajadagi uchrashuv va tadbirlar rejasi ham koʻrib chiqildi.