Foto: minsport.uz

Joriy yil 26-iyul kuni Buyuk Britaniyaning Birmingem shahrida Xalqaro kriket kengashi (ICC)ning navbatdagi kongressi boʻlib oʻtdi. Mazkur kongressda kriket boʻyicha bajarilayotgan ishlar sarhisob qilindi.

Kongress reglamentiga muvofiq, kriket rivojlanayotgan mamlakatlarning ICCga aʼzolik masalalari ham muhokama qilindi.

Eʼtiborli jihati, kongressda Oʻzbekiston kriket federatsiyasi tomonidan amalga oshirilayotgan ishlar muhokamaga qoʻyildi va bir ovozdan xalqaro kriket kengashining aʼzoligiga qabul qilindi. Shunday qilib, Oʻzbekiston kriket federatsiyasi Xalqaro kriket kengashining (ICC) aʼzolik roʻyxatiga 106-davlat sifatida qabul qilindi.

«Davlatimiz rahbari Shavkat Mirziyoyev saʼy-harakatlari bilan bugun har sohada, jumladan, jismoniy tarbiya va sportga yaratilayotgan imkoniyatlar beqiyos. Shu bois, sportchilarimiz yurtimiz bayrogʻini dunyo arenalarida koʻz-koʻz qilishmoqda. Oʻzbekiston kriket federatsiyasi ham Xalqaro kriket kengashining aʼzosiga aylandi va ushbu munosabat bilan barcha yurtdoshlarimizni, sportchilarimizni muborakbod etaman. Umid qilamanki, oʻzbekistonlik kriketchilari ham yaratilayotgan keng imkoniyatlardan foydalanib, kriket boʻyicha xalqaro musobaqalarda vatanimiz sharafini munosib himoya qilishadi», deydi Xalqaro kriket kengashining (ICC) kongressida ishtirok etgan Oʻzbekiston kriket federatsiyasi raisi Aziz Mixliyev.

Eslatib oʻtamiz, Xalqaro kriket kengashi (ICC)ning Osiyo mamlakatlarida kriketni rivojlantirish boʻlimi boshligʻi, oliy toifali xalqaro ekspert, janob Iqbol Sikander va ICCning moliyalashtirish ishlari menejeri Nitesha Kotxari xonim joriy yil 11-13-iyul kunlari Toshkentda boʻlib, OʻKF faoliyati bilan yaqindan tanishib, xulosalarini xalqaro kriket kengashi (ICC) rahbariyatiga taqdim etishgan edi.