Fransiya poytaxtida oʻtkazilayotgan yozgi Olimpiada oʻyinlarida oʻzbek sportchilari oʻz yurishlarini davom ettirmoqda.

Dzyudochilarimiz bugun aralash jamoaviy dasturda oʻz ishtiroklarini boshlashdi. Qurʼaga koʻra, hamyurtlarimiz 1/8 finalda Kanadaga qarshi bahs olib borishdi va 4:0 hisobida yaqqol ustunlik bilan gʻalaba qozondi.

Dastlab, Shukurjon Aminova “Parij-2024” gʻolibi Krista Deguchini uchta shido evaziga magʻlub etdi. Soʻngra, -73 kg vazn toifasida tatamiga chiqqan Murodjon Yoʻldoshev Artur Marjelidonni ippon bilan taslim etdi.

Olimpiadadagi omadsizligiga qaramay -70 kg vazn toifasidagi sportchi qizimiz Gulnoza Matniyazova Katerin Boshnen-Pinarni ippon bilan yutdi. 90 kggacha boʻlgan sportchilar oʻrtasidagi bahsda jahon chempioni Davlat Bobonov bitta vaza-ari evaziga Fransua Gote-Drapoga imkon qoldirmadi.

Quvonarlisi shundaki, Irisxon Qurbonboyeva va Olimpiada bronza medali sohibi Alisher Yusupov tatamiga chiqishiga hojat qolmadi.

Qayd etish kerakki, endi hamyurtlarimiz yarim final yoʻllanmasi uchun Italiyaga qarshi bellashishadi.

“Xalq soʻzi” dzyudochilarimizga aralash jamoaviy bahslarda ham omad tilaydi.

Avvalroq, Anna Prakaten Olimpiada oʻyinlarini 11-oʻrinda yakunlagani haqida xabar berilgandi.