Oʻzbekistonning Favqulodda va Muxtor Elchisi Ravshan Usmanov Islandiya Prezidenti Xalla Tomasdottirga ishonch yorliqlarini topshirdi. Bu haqida “Dunyo” axborot agentligi xabar berdi.

“Ikki tomonlama munosabatlar tarixida ilk bor Oʻzbekiston elchisining ushbu mamlakatga tayinlanishi, hech shubhasiz, oxirgi yillarda Oʻzbekiston Prezidenti tomonidan olib borilayotgan ochiq va pragmatik tashqi siyosatning natijasidir”, deydi Islandiya prezidenti Xalla Tomasdottir.

Muzokaralar chogʻida Oʻzbekiston va Islandiya oʻrtasidagi hamkorlikni rivojlantirish istiqbollari boʻyicha fikr almashilib, savdo-iqtisodiy, madaniy va turizm sohalarida aloqalarni jadallashtirish masalalariga alohida eʼtibor qaratilgan.

Shuningdek, uchrashuv yakunida Xalla Tomasdottir Oʻzbekiston rahbariyati va xalqiga farovonlik hamda bardavom taraqqiyot, Oʻzbekiston elchisining ikki tomonlama munosabatlarni rivojlantirish va kengaytirish yoʻlidagi ishlariga esa muvaffaqiyatlar tiladi.

Eslatib oʻtamiz, Oʻzbekiston va Islandiya oʻrtasidagi diplomatik munosabatlar 1997-yilning 25-sentyabrda oʻrnatilgan.

Maʼlumot uchun, Oʻzbekistonning Favqulodda va Muxtor Elchisi Ravshan Usmanov 2024-yilning 16-may kuni Buyuk Britaniya va Shimoliy Irlandiya Birlashgan Qirolligi Qiroli Charlz III ga ishonch yorliqlarini topshirgan edi.