Ўзбекистоннинг Фавқулодда ва Мухтор Элчиси Равшан Усманов Исландия Президенти Халла Томасдоттирга ишонч ёрлиқларини топширди. Бу ҳақида «Дунё» ахборот агентлиги хабар берди.

«Икки томонлама муносабатлар тарихида илк бор Ўзбекистон элчисининг ушбу мамлакатга тайинланиши, ҳеч шубҳасиз, охирги йилларда Ўзбекистон Президенти томонидан олиб борилаётган очиқ ва прагматик ташқи сиёсатнинг натижасидир», дейди Исландия президенти Халла Томасдоттир.

Музокаралар чоғида Ўзбекистон ва Исландия ўртасидаги ҳамкорликни ривожлантириш истиқболлари бўйича фикр алмашилиб, савдо-иқтисодий, маданий ва туризм соҳаларида алоқаларни жадаллаштириш масалаларига алоҳида эътибор қаратилган.

Шунингдек, учрашув якунида Халла Томасдоттир Ўзбекистон раҳбарияти ва халқига фаровонлик ҳамда бардавом тараққиёт, Ўзбекистон элчисининг икки томонлама муносабатларни ривожлантириш ва кенгайтириш йўлидаги ишларига эса муваффақиятлар тилади.

Эслатиб ўтамиз, Ўзбекистон ва Исландия ўртасидаги дипломатик муносабатлар 1997 йилнинг 25 сентябрда ўрнатилган.

Маълумот учун, Ўзбекистоннинг Фавқулодда ва Мухтор Элчиси Равшан Усманов 2024 йилнинг 16 май куни Буюк Британия ва Шимолий Ирландия Бирлашган Қироллиги Қироли Чарлз III га ишонч ёрлиқларини топширган эди.